Бөлүмдөр
Шейшемби, 17-сентябрь
Жалал-Абад облусуАксы району 03.06.2016 17:28

Айыл турмушу: Аксыдагы Сары-Жайык айылынын окуучулары мектепке баруу үчүн 7 чакырым жол жүрүшөт (фото)

Turmush -  Аксы районунун Кош-Дөбө айыл өкмөтүндөгү Сары-Жайык айылы айыл өкмөттүн борборунан 7 чакырым алыс жайгашкан. Жаңы конушта мектеп жок болгондуктан 20 кожолукта жашаган 15тен ашуун окуучу мектепке каттап окуудан кыйналып келишет.

8-класстын окуучусу Адыл Атамовдун айтымында, алыстан каттап окугандар дайым эле айдоочуга жол акы берүүгө мүмкүнчүлүгү боло бербейт.

«Үйдөн жөө жөнөсөм 2-сабакка жетип келем. Мугалимдер түшүнүп, бизди урушпайт. Кичи автобус же унаа менен барсак жол кире төлөш керек. Ата-энебиз да күндө эле бизге акча бере бербейт», - дейт Адыл.

Ата-энелер балдары мектептен үйгө келгенче тынчсызданышат. Жол бойлоп барган окуучулар кышкысын көп кыйналат. Кээде мектептен үйгө жөө келишет.

«Кызым сабагын көп калтырат. Себеби кичи автобустар, унаалар албай коёт, алса да акча сурайт. Мектепке кеткенде коркуп отурабыз. Кечигишсе жолго чыгып күтөбүз. Айрыкча жаан-чачында, кар жааганда тынчсызданабыз. Талаада чөөлөр, түлкүлөр бар. Кээде жырткычтар үйдүн жанына чейин келип калат», - деди Сары-Жайык айылынын тургуну Дилбар Шералиева.

Мавлянов атындагы орто мектептин жетекчилиги Сары-Жайык айылынан каттап окуган балдарга жеңилдиктерди берген. Социалдык педагог Абдыразак Султанкуловдун айтымында, 1-класстан 9-класска чейин жалпы 15 окуучу каттап окуйт.

«Сары-Жайык айылынан каттап окуган балдарга ата-энелери менен байланышып туруу үчүн мектепке уюлдук телефон алып келүүгө уруксат бергенбиз. Сабакка кечигип келсе, катуу чара көрбөйбүз. Акыркы сабактарынан бошотобуз. Ушундай шарттарды түзүп бергенбиз. Арыз аркылуу атайын унаа каттатып коюуну суранганбыз, бирок азырынча кабар жок», - деди А.Султанкулов.

Алыстан каттап окуган балдар жеткиликтүү деле билим алышпайт, дешет жергиликтүүлөр.

«Балдарыбыз кыйратып деле сабак окуй албайт. Эртең менен биринчи сабакка кечигип барса, кайра эле акыркы сабакка катышпай калышат. Күнүнө 3 эле сабак окуп калышат. Эгер катуу жамгыр же кар жааса, маршрутка жок болсо, биз балдарыбызды жөнөтпөй деле коёбуз.

9-класста окуган уулум көп сабак калтырды. Себеби ал эртең менен суукта маршрутка күтүп туруп, суук тийип, ооруп калыптыр», - дейт тургун Д.Шералиева.

Маршруттук каттамдар балдардан жол акы албасын деген сураныч менен айылдыктар жергиликтүү бийликке кайрылышкан. Атайын чечим чыкканы менен кайра эле жол кире талап кылынып жатканын айтышууда.

«2013-жылы апрель айында арыз жазып, май айында жооп келген. Анда Сары-Жайыктан Кош-Дөбөгө чейин жана Кош-Дөбөдөн Сары-Жайыкка чейин окуучулар үчүн жол акы алынбасын деген чечим чыгарылган. Бирок, кайра эле окуучулардан жол акы сурай башташты. Чындыгында ата-энелер күндө балдарга 20-40 сом берип окутканга чамабыз жетпейт. 3-4 баласы окуган үй-бүлөлөр бар. Быйыл да айыл өкмөткө, райондук билим берүү башкармалыгына кайрылдык. 7 жашка толгон жана андан жогорку жаштагы окуучулар жол акы төлөөгө тийиш деген чечим чыгарыптыр.

Кызым окуусуна кеткенде кооптонуп отурам. Анткени чек арага жакын жерде отурукташканбыз. Мектеп жамааты бир күн бирөөңөр, экинчи күнү башка ата-эне унаа менен ташып тургула деп сунуш кылышкан. Бирок, биз балдарыбызды ташып окутууга шартыбыз жетпейт», - дейт Д.Арстанов.

Кош-Дөбө айыл аймагынын жетекчилиги жол азабын тарткан окуучулардын көйгөйүн чечүүгө аракет кылганын айтты.

«Сары-Жайыктын тургундары бизге 2 маселе менен кайрылышкан. Биринчиси — балдарды кичи автобустар албай жатканы, экинчиси — окуучулардан жол киреге талап кылуу боюнча. 1-маселени чечип бердик. Ал эми, 2-маселе боюнча биздин райондогу автобекет менен макулдаштык. Шамалды-Сай жана Таш-Көмүр каттамы биздин районго караштуу болгондуктан окуучулардан акча албай турган чечимге келишкен.

Ал эми, башка каттамдагылар биздин районго карабаганына байланыштуу жол кире алышат. Алар менен сүйлөшсөк, мыйзам боюнча 7 жаштан жогоркуларга жол акы төлөнөт деп жазылганын айтып, көнбөй коюшкан. Сары-Жайык айылындагы 15 окуучу үчүн мектеп кура албайбыз. Унаа каттатууга да каражат көп кетет жана аны аткаруу кыйын», - дейт ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×