Бөлүмдөр
Шейшемби, 17-сентябрь
Жалал-Абад облусуАксы району 14.09.2016 18:30

Айыл турмушу: Аксылык А.Өскөнбаев жайлоодо балык чарба иштетип, туристтерди тейлөөдө (видео, фото)

Turmush -  Аксы районунун Итагар айылынын тургуну Алмаз Өскөнбаев айылдан 15 чакырым алыстыкта жайгашкан жайлоого балык бага баштады. Ал балык багууну мындан 4 жыл мурда колго алган.

А.Өскөнбаев Turmush басылмасынын кабарчысы менен болгон маегинде билдиргедей, учурда ал сазан балыгын багып, сатыкка чыгарууда. Анын 1 килограммы 250 сомго бааланып, буюртма бергендер көбөйүүдө. Балык багылган көл 5 сотых жерди ээлейт. А.Өскөнбаев Баба-Ата жайлоосуна Итагар айылынан ат менен жетет.

«Балык багууга жаш кезимден эле кызыгып жүрчүмүн. Мындан 4 жыл мурда Өзбекстандан сазан балыгынын уругун алдырып, көлгө таштай баштагам. 2 жылдан кийин алар чоңоюп,  жеп баштадык. 2 жылдан бери балык көбөйүп жатат. Учурда аларды сатыкка чыгарып жатам», - деди А.Өскөнбаев.

Ишкер балыктарына жыл сайын 2 тоннага чейин жем берип, анын санын көбөйтүүнүн аракетин көрүп келет. Кышкысын дагы тоңгон музду жарып, балыктарга жем берет. Быйылкы жылы ал 200 килограмм балык саткан.

«Мен балыктарды кармап, айылга алып барып муздаткычка сылып коем. Буюртма бергендер үйгө келип алып кетишет. Учурда жайлоого келип эс алып, балык жеп кеткендер көбөйүүдө. 1 килограмм балыкты 250 сомдон сатып жатабыз», - дейт А.Өскөнбаев.

Балык багылган көлдүн айланасына жайкысын чет өлкөдөн туристтер дагы келип турат. Ишкер келечекте балык чарбасын кеңейтүүнү пландап жатат.

«Келечекте балык чарбасын чоңойтуп, балыктарды райондон сырткары жерге дагы экспорттоо пландалып жатат. Иштесең тиштейсиң дегендей аракет кылсак чоң ийгиликтерге жетебиз. Учурда көлдү балыкка толтуруунун аракетин көрүп жатабыз», - деди ал.

Ишкерге жубайы Бактыгүл Өскөнбаева дагы көмөктөшөт. Ал жолдошу көпчүлүк убактысын балык кароо менен өткөрөрүн белгилейт.

«Мен деле балык кармоону үйрөнүп калдым. Жолдошум жок учурда балыктарга азык берем. Жолдошум көпчүлүк убактысын балык кароого кетирет. Ал балык кармап отурганда эс алам деп айтып калат», - деди ал.

Ишкер учурда 44 жашта, 2 уулу, 3 кызы бар. 90 жаштагы апасы менен бирге жашашат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×