Бөлүмдөр
Шейшемби, 17-сентябрь
Жалал-Абад облусуАксы району 01.11.2016 09:21

Айыл турмушу: Үй шартында сыр жасап саткан аксылык Жийдегүл айылдыктарды таза сыр менен камсыздоону пландоодо (фото)

Turmush -  Аксы районундагы Туюк-Жар айылынын тургуну Жийдегүл Мавлянова үй шартында сыр жасап сатуу менен киреше табат.

Ж.Мавлянова Turmush басылмасынын кабарчысы менен болгон маегинде билдиргендей, ал таттууларды бышырууну жактырып, балдарына, кайын журтуна торттордун түрүн жасап берчү. Балдары сырды жакшы көргөндүктөн, дүкөндөн көп сыр сатып алчу. Бирок, анын зыяндуулугу тууралуу уккандан кийин базардан сыр сатып алуудан баш тарткан.

«Сырды узак убакытка чейин сактоо үчүн адамга зыян болуучу түрдүү кошулмалар кошула турганын интернет булактарынан окудум. Андан улам сатып албастан, аны үй шартында жасоону интернеттен караштырдым. Байкасам биздеги эле бар азыктар колдонулат экен. Биринчи жасаганда эле сырым окшошуп калды, балдарым да жакшы көрүп жешти.

Бара-бара базардагыдай эле сыр боло баштады. Менин сыр жасаганымды билгендер тойго, жакшылыктарга буюртма бере баштады. Өзүм кандай өтөт экен деп кызыгып, Кербен шаарындагы бир дүкөнгө таштап кеттим. Кызыгы болгон 1 кг сырды дүкөндөн көргөн чет өлкөлүктөр алып кетишиптир. Дүкөндө отургандар өздөрү ооз тийбей калганын айтышты. Андан улам менде кызыгуу пайда болуп, сыр жасоону уланта бердим», - дейт Ж.Мавлянова.

Ал сүттү иритүүчү кошулмаларды да колдонбойт, сүт ирисин деп эки күн коюп коёт.

Жайында көбүрөөк сыр жасоону пландап, күнүнө 150 литрге чейин сүт сатып алып сыр жасап көргөн. Бирок, үй тиричилигине байланыштуу алынган сүттү иштетүүгө жетишпей калган.

Алдыда айылдыктарды химикалык кошулмасыз сыр менен камсыз кылуу максатында долбоор жазып, максатын жүзөгө ашырууну пландоодо.

Жийдегүл 6 баланын энеси. Үй-бүлө мүчөлөрүнүн туулган күнүндө же майрам күндөрү өз колу менен торт жасап берет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×