Бөлүмдөр
Ишемби, 21-июль
Жалал-Абад

Айыл турмушу: Россиядан тажрыйба алган элеттик уста Б.Таштанбеков эми 3D форматындагы полдорду жасайт

Turmush -  Аксы районуна караштуу Кызыл-Жар айылынын 31 жаштагы тургуну Бегалы Таштанбеков улуттук орнаменттер түшүрүлгөн керме шыптарды жасоо менен алек. Акыркы 1,5 жылдан бери кыргыз туусу түшүрүлгөн шыптарды жасап жатат. Аймактык кабарчы элеттик уста менен таанышты.

Ал да башка мекендештер сыяктуу жумушсуздуктун айынан 2007-жылы Россия Федерациясына кетип, курулушта иштеген. Бул өнөрдү ошол жактан үйрөнгөнүн айтты.

«Көбүнчө кыргыз балдар биригип алып, европалык стилдеги оңдоо иштерин жасачу элек. Ал эми керме шыптарды кесипкөй орус усталар жасашчу. Алардын жасаган жумушу мени кызыктырып, бирге иштегендерге "жүргүлө карап үйрөнүп алалы, алардан эмнебиз кем экен" деп айта берчүмүн. Аларга жардамдашып жүрүп үйрөнүп алдым. Кийинчерээк өз алдымча жасап көрсөм окшоду. Колумдан келе турганына көзүм жетип, өзүм да керме шыптарды жасап баштадым. Кардарлар да көбөйө баштады», - деди уста.

Бегалы Таштанбековдун айтымында, чет жакта тапкан акчаны эми айылында эле таап жатат.

«Жалпысынан 8 жылдан бери устачылык менен алектенем. Учурда керме шыптарга керектелүүчү буюмдарды Германиядан буйрутма берип алдырам. Акыркы үч жылдан бери айылда эле иштеп жатам. Жакынкы район-шаарларга да чакыруулар көп болууда», - деп кошумчалады.

Акыркы 1,5 жылдан бери кардарлар мамлекеттин туусу түшүрүлгөн шыптарга өзгөчө маани берип жатышат.

«Бул көрүнүш патриоттук сезимди ойготот. Элибиз да туу түшүрүлгөн керме шыпты жактырып, жасатып жатышат. Алдыда 3D форматындагы полдорду жасайын деп пландап жатам», - деди элеттик уста.

Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 1606
Комментарии
Для добавления комментария необходимо быть нашим подписчиком
Көп окулду
×