Бөлүмдөр
Жума, 20-июль
Жалал-Абад

Аксыда өзбек чек арачысы атып өлтүргөн тургундун үй-бүлөсүнө Өзбекстан 5 миң доллар берди

Turmush -  Кыргыз-өзбек мамлекеттик чек арасынын Аксы районундагы аймагында ок тийип каза болгон 34 жаштагы Фархад Абдыкалыковдун үй-бүлөсүнө Өзбекстан 5 миң АКШ долларын берди. Бул тууралуу Кербен шаардык кеңешинин депутаты Эргешалы Озокеев билдирди.

Анын айтымында, Өзбекстандын Кыргызстандагы элчиси келип, каза болгон жарандын үй-бүлөсүнө 5 миң доллар акчалай жардам берген.

«Акчалай жардам Кербен шаардык кеңешинин депутаттарынын талабы менен төлөндү. Бирок, депутаттар бул үй-бүлөгө үй алып берүүнү талап кылып жатышат. Каза болгон жарандын 4 баласы жетим калды. Аларды жалгыз бой эне кантип багат? Ошондуктан бул үй-бүлөгө турак үй алып берүүнү талап кылып жатабыз», - деди ал.

Кербен шаардык кеңеши Жогорку Кеңештин депутаттарына жардам берүү боюнча кат жолдогон. Кийин Мамлекеттик чек ара кызматы 5 миң АКШ доллар акчалай жардам көрсөтүлгөнүн айтып, кат аркылуу жооп кайтарган.

Катта өзбек тарап 5 миң доллар төлөп бергенин жана балдарына жөлөк пул төлөө үчүн алардын күбөлүктөрүнүн көчүрмөсүн алып кеткени жазылган.

Кербен шаарынын мэри Нармат Эсеналиев Өзбекстандан атайын топ келип, жабыркаган үй-бүлө менен жолугуп кеткенин белгилеп, бирок акчалай жардам берилгенин же берилбегенин так айта албай турганын билдирди.

Буга чейин 2018-жылдын 7-апрелинде Аксынын Мамай айылында ошол эле райондун Курулуш айылынын 34 жаштагы тургуну өзбек чек арачысынын ок атуусунан улам каза болгондугу маалымдалган.

Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 2951
Комментарии
Для добавления комментария необходимо быть нашим подписчиком
Көп окулду
×