Бөлүмдөр
Жекшемби, 25-август
Нарын облусуЖумгал району 22.12.2018 20:04 На русском

Жумгалда эки небереси менен кошо өлтүрүлгөн аял 4 баланын апасы болчу (сүрөт)

Turmush -  Жумгалдын Көк-Ой айылында киши колдуу болуп каза болгон 47 жаштагы аял менен эки небереси бүгүн, 22-декабрда жерге берилди. Алар маркум аялдын ошол эле айылдагы кайнатасы жашаган үйдөн узатылды.

Айылдаштарынын айтымында, маркум 4 баланын апасы болчу. Ал эми өзү менен бирге каза болгон 4 (кыз бала) жана 7 (эркек бала) жаштардагы жээн неберелери улуу кызынын балдары болгон. 26 жаштагы кызы күйөөсү менен ажырашып, балдарын апасы багып өстүргөн. Маркумдун улуу кызы, уулу (23 жашта) жана эгиз кыздары (22 жашта) Бишкек шаарында окуп, эмгектенип жүрүшкөн. Ал эми жолдошу 2017-жылы көз жумган.

Окуя 21-декабрга караган түнү болуп, шектүү – 29 жаштагы жергиликтүү тургун (эркек киши) камакка алынган. Оор кылмышка тиешелүү экспертизалар дайындалып, козголгон кылмыш иштин негизинде ыкчам тергөө иштери жүрүп жатат.

................................................................

Окуя тууралуу

Ички иштер министрлигинин басма сөз кызматынын билдирүүсү боюнча, кечээ, 21-декабрда Жумгал РИИБдин нөөмөт бөлүмүнө Көк-Ой айыл өкмөтүндөгү Көк-Ой айылындагы турак үй өрттөнүп, адамдар каза болгону тууралуу маалымат түшкөн.

Окуя болгон жерге ыкчам тергөө тобу барып, Нарын ОИИБ менен Жумгал РИИБдин кызматкерлери биргелешип жүргүзгөн алгачкы иликтөө иштеринин натыйжасында кылмыштын изи табылды.

Алгач өрттөнгөн үйдүн 47 жаштагы жашоочусу Эрмекгүлдүн (ысымы өзгөртүлдү) жансыз денеси өрт чыккан бөлмөдөн табылган. Ал эми башка бөлмөдөн эки кичинекей баланын денеси табылды. Кийинчерээк ал балдар маркум аялдын неберелери — төрт жаштагы Илима (ысымы өзгөртүлдү) жана 7 жаштагы Ильяз (ысымы өзгөртүлдү) экени такталган.

Расмий маалымат боюнча, алгачкы кароо жүргүзүүдө 47 жаштагы Эрмекгүл (ысымы өзгөртүлдү) менен 4 жаштагы Илима (ысымы өзгөртүлдү) зордукталганы аныкталган. Ал эми 7 жаштагы балага күч колдонуп, муунтуп өлтүрүшкөн. Бул факты боюнча тиешелүү экспертизалар дайындалып, тергөө иштери ыкчам жүргүзүлүп жатат. Тиешелүү берене менен кылмыш иш да козголгон. Көп узабай шектүү — 29 жаштагы жергиликтүү тургун (эркек киши) кармалып, сурак берип жатканы маалым болду.

Шектүүнүн алгачкы көрсөтмөсү боюнча, 20-декабрда саат 21:00дөн тарта 23:00гө чейин маркум менен бирге анын үйүндө спирт ичимдигин ичишкен. Эрмекгүл уктап калганда башка бөлмөдөн уйкудан ойгонуп чыккан 4 жаштагы кызды күч колдонуп зордуктаган. Анын жанында уктап жаткан 7 жаштагы бала ойгонуп кеткенде алгач колу менен муунтуп өлтүрүп, андан кийин кызды да тумчуктуруп өлтүргөнүн айткан.

Андан кийин башка бөлмөдөгү Эрмекгүлдү муунтуп өлтүрүп, кылмышты жашыруу максатында мештеги чоктон бөлмөгө чачкандан кийин качып кеткен.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×