Бөлүмдөр
Жекшемби, 19-январь
Жалал-Абад облусуАксы району 13.01.2020 16:45

Айыл турмушу: Чебер З.Адылбекова көздүн жоосун алган кийимдерди токуйт

Turmush -  Аксы районунун Кербен шаарынын 54 жаштагы тургуну Зебикан Адылбекова кол өнөрчүлүк менен алектенет. Аймактык кабарчы аны менен таанышты.

Өзүнүн айтымында, ал биринчи жолу уулуна баш кийим токуп берип, кийин бул өнөрдү улантып кеткен.

«1988-жылы улуу балам төрөлдү. Үйдө бекер отурганда балама топу жана жылуу кийим токуп бердим. Кийим токуганга кызыгуум күч болгондуктан бул өнөрдү тез эле өздөштүрүп кеттим. Акыркы 32 жылдан бери кийим токуп жатам. Балдарыма кийим токуп бер деген адамдар көбөйдү. Азыр буйрутмалардан кол бошобойт. Базарга алып чыгып сатпайм. Буйрутмаларды аткарууга араң жетишем. Эгер башка ишке алаксыбай, кийим токуу менен гана алектенсем көп кийим токуса болот», - деди Зебикан Адылбекова.

Анын айтымында, жаш балдардын токулган кийимдери түрдүү баага бааланат.

«Мен жаш балдардын эле кийимин токуйм. Ага көп деле убакыт коробойт жана жип дагы аз кетет. Чоң адамдардын кийимине көп жип керек. Ошол себептен аялдарга баш кийим гана токуп сатам. Мисалы, жаш балдардын кийими жашына жараша бааланат. 1 жаштан 5 жашка чейинки балдардын байпагы 200-300 сомдон, баш кийимдери 400 сомдон башталат. Ал эми күрмөлөрү 500-600 сомдон болот. Мисалы, бир жаш балага баш кийим, байпак, жана күрмө токусам 1 миң сомго сатам. Орто эсеп менен алганда айына 10 миң сомдон ашык киреше түшөт. Дайыма эле кийим токууга убакыт жок. Бош калганда гана кийим токуйбуз. Бир жаш бала үчүн баш кийим, байпак, күрмөнү 3 күндө токуйм», - деди чебер.

Зебикан Адылбекова жиптерди атайын буйрутма менен алат.

«Акыркы убакта колго токулган кийимдерге суроо-талап өстү. Анын сапатына дагы басым жасап жатышат. Кийимдерди сапаттуу жип менен токуу үчүн жипти чет өлкөдөн алдырып жатам. Базарда сатылган кийимге караганда колго токулган кийимдер жылуу жана сапаттуу болот. Мурда колго токулган кийимдерди көп кийишчү. Эми азыр дагы бааланып жатат.

Буйрутма берген адам өзүнө жаккан түстү тандап алат. Анан ар түрдүү жаныбардын сүрөтүн же кыргыздын оймо-чиймесин түшүрүп берүүнү суранат. Мен кардардын талабын аткарууга аракет кылам. Жаныбарлардын сүрөтүн атайын бир дептерге түшүрүп алгам. Ошол сүрөткө карап токуйм. Айрым учурда өзүмдүн идеям менен кооздоп берем. Негизинен мен токуган кийимдер кардарларга жагат.

Кийимдин 30га жакын түрүн токуйм. Муну мага эч ким үйрөткөн жок. Өзүмдүн кызыгуумдан улам ишке ашырдым. Айрым кийимдерди интернеттен көрүп токуйм. Жаңы идеяларды интернеттен алам», - дейт чебер.

Зебикан Адылбекованын 1 кызы, 2 уулу жана 3 небереси бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×