Turmush — Жалал-Абад облусунун Аксы районуна караштуу Үч-Коргон айыл аймагында машыгуу залынын курулушу 5 жылдан кийин кайра жанданды. Бул тууралуу Turmush басылмасына айыл өкмөт башчысы Маматысак Жапаров билдирди.
Анын айтымында, курулуш иштери ушул жылдын аягына чейин бүткөрүлүп, машыгуу залы пайдаланууга берилет.
«Н.И.Мешков атындагы эс алуу багынын ичинде жайгашкан машыгуу залына 4-5 жыл мурда каркасы орнотулуп, бирок курулуш аягына чыкпай калган. Быйылкы жылы акча каражаты бөлүнүп, курулушу башталды. Жалпы сметасы 17 млн сомго бааланган машыгуу залынын курулушу мамлекеттик бюджеттен каржыланып жатат. Капиталдык курулуш башкармалыгы тендер жарыялап, андан «Данка Строй» ЖЧКсы утуп алып, ишти баштады. Куруучулар 1-январга чейин толук бүтүрө турганын айтышты», - деди Жапаров.
Юстиция министрлигинин маалыматтар базасындагы маалымат боюнча, «Данка Строй» жоопкерчилиги чектелген коомунун жетекчиси жана түзүүчүсү — Мураталиев Нурбек Якуббекович. Компания 2023-жылы 10-мартта кайра каттоодон өткөн. Негизги ишмердүүлүгү: турак жайларды жана имараттарды куруу.